كشف الإعلامي شريف مدكور عن مجموعة من الشروط التي وضعها لظهور المحجبات في برنامجه “شارع شريف” الذي يذاع عبر قناة “الحياة” .
وذلك بعد ظهور عدد من السيدات المحجبات اللاتي استضفهن في برنامجه بشكل لا يليق بالحجاب، مما دفعه إلى اتخاذ قرار بوضع “دريس كود” خاص بهن وسيتم الاتفاق عليه مع الضيفة قبل ظهورها في البرنامج .
وتحدث شريف مدكور عن هذا الأمر في مقطع فيديو نشره عبر حسابه على موقع التواصل الاجتماعي “فيس بوك” تحت عنوان: أكيد كل واحد حر، لكن اللي اختار أو اختارت حاجة معينة لازم يكملوها .
فقال: “المضوع اللي هتكلم فيه موضوع حساس وخاص بالمحجبات، أنا عندي في البرنامج عامل دريس كود يعني أي واحدة محجبة هتطلع عندي لازم تكون لابسة ما لا يصف ولا يشف” .
تابع: “ابتديت ألاحظ إن جه ناس ضيوف محجبات لابسين طرحة أو تربون ولابسين “بادي” وهما ممتلئات شوية وكل جسمهم متفسر وبنطلون ضيق جدا وجزمة بكعب وميكب كامل ورموش .. طبعا كل واحد حر في لبسه بس أنا بالنسبالي ده مش هيطلع على الشاشة” .
أضاف “مدكور”: “حطيت قواعد أي سيدة محجبة هتظهر عندي في البرنامج لازم تكون لابسة فضفاض، مش ألوان صاخبة، لو هتلبس بنطلون يبقى واسع .. هما مش قادرين يستوعبوا ده والرد بيكون ما انت بتطلع ناس لابسين عريان، هم مش محجبات” .
واصل: “اللي اختارت تكون محجبة هي شايفة إن ده فرض وليه شكل وزي معين اللي هو بالنسبالي لا يصف ولا يشف، المحجبة بتتنازل عن جمالها ومتبقاش ملفتة للنظر .. ابتدى يحصل مشاكل والضيوف يزعلوا بس مش هتطلعوا كده” .
استطرد: “المصيبة بقى من شهر معايا مدرسة بيعملوا شو باليه، لقيت 4 بنات فيهم 3 بنات محجبات وبنت مش محجبة لابسين إيه بقى بنطلون استرتش وال “بادي” جوة .. أنا وقفت تصوير وقولتلهم ازاي هتطلعوا كده، فالمدربة بتاعتهم تقولي هم عشان اتحجبوا مينفعش يرقصوا باليه” .
وأشار الإعلامي المصري إلى أن ملابس رقص الباليه وحركاته لا تناسب المحجبة، مضيفا: “المدربة بتبصلي وهي مش مقتنعة بالكلام والبنات عيطوا واضطريت عشان أراضيهم أعمل الشو وبقيت ببص الناحية التانية وبغض البصر” .
واختتم شريف مدكور: “أنا مش عايز حد يزعل من الكلام ده .. أنا بقيت أقول للمعدين لو الضيفة محجبة تبعتلي صورة هي هتلبس إيه، هعمل إيه ما أنا مش هطلع على الشاشة صورة بلدي أو صورة ديني حد يقول إيه ده .. أي ضيوف محجبات ياريت بلتزموا بالزي اللي بنقول عليه” .